comme je croy, apercevant venir ceux qui me cherchoient, je fus tout estonné que luy et toute la trouppe, frappant des mains tout à coup dans l’eau, ils la firent rejallir si haut, que je les perdis de veue, et je demeuray comme endormy, ainsi que me dirent ceux qui me treuverent, non pas si pres de la fontaine que je pensois estre, mais au mesme lieu où m’avoit laissé celuy qui les estoit allé querir.
– Voilà, dit Adamas, veritablement une merveilleuse vision, que je penserois, quant à moy, estre un songe, mais non pas de ceux qui viennent ordinairement, car celuy-cy sans doute signifie que quelque grand, et remarquable personnage habitera ces solitaires rochers, et rendra ces rives glorieuses par la grande renommée qu’il acquerra, qui se doit juger devoir estre tres-grande, puisque les promesses en sont faites par les destinées, avec des paroles si advantageuses. – Je ne sçay, respondit Alcidon, si ce fut un songe ; mais il est bien certain qu’il me sembloit de veiller.
Et puis, il continua de cette sorte : Je montay à cheval, et, pour abreger, je ne m’arresteroy point à vous deduire les particularitez de mon retour. Tant y a qu’apres plusieurs et divers perils, j’arrivay où j’avois laissé le roy Euric, qui me receut avec beaucoup de caresses. Et parce qu’outre l’honneur qu’il me faisoit de m’aimer, encore se plaisoit-il infiniment de sçavoir les bonnes ou mauvaises fortunes qu’on avoit en amour,
