verray quels seront les effets de vos promesses, tant en l’observation de mes advis, qu’en la remise de ce cœur que vous me promettez.
A ce mot, estant arrivez à la porte du jardin, je pris congé d’elle, et ayant trouvé celuy qui m’attendoit pour me guider, nous nous mismes au petit pas pour retourner à nos rochers. Mais comme si le Ciel eust voulu plaindre nostre separation, tout à coup il se troubla et couvrit de tant de nues, que non seulement nous perdismes la clarté de la lune, mais fusmes de sorte mouillez de la pluye, que nous fusmes contraints de nous retirer sous un arbre, attendant que ceste grande furie fust passée. Celuy qui me conduisoit perdit de sorte la cognoissance du chemin, que, quand nous voulusmes aller où estoient ceux qui m’attendoient, il s’egara et me mena jusques à la source de la fontaine qui donne et le nom et le commencement à la riviere de Sorgues.
Cette fontaine est toute entourée de si grands rochers, à l’extremité de cette vallée, qu’elle semble estre enclose par eux, comme si c’estoient de hautes murailles, sinon du costé d’où nous venions. Quand ceste source est en son repos, elle semble un grand puits, qui laisse escouler ses eaux pour estre trop remply. – Mais, me disoit celuy qui me servoit de guide, quelquefois ceste fontaine est la plus espouvantable qui se puisse dire. Car voyez-vous la hauteur de
