nous nous entretinsmes de si agreables discours ; que quand j’oyois un horloge, qui estoit sur la table, il me sembloit qu’il sonnoit les quarts d’heure, et non pas les heures entieres.
Je n’aurois jamais fait, si je voulois raconter tous les discours qui furent entre nous, et, de peur d’estre trop long, je diray seulement qu’enfin estant pressé de partir, après avoir reculé mon departement tant qu’il m’estoit possible, je repris la main de ma belle maistresse, et, mettant un genou sur un carreau, je luy dis : – Enfin, madame, me voicy à la fin de mon bonheur. Delie et le temps me pressant de partir, je voy bien que ny l’un ny l’autre ne ressent point ma passion, mais vous, qui en estes la cause, serez-vous aussi insensible comme eux ? – Alcidon, me respondit-elle, ne vous plaignez point de moy, et vous souvenez que si je ne yous aimois, je n’eusse pas eu la resolution de vous voir icy, puis que s’il n’y alloit que de ma vie, ce seroit peu de chose, mais y mettant la vostre aussi, et mon honneur, vous devez croire que la passion qui m’a bouché les yeux à toutes ces considerations doit estre tres-grande. – Madame, luy dis-je, c’est ce qui me fait estonner, qu’ayant desjà fait tant pour moy, vous fassiez à ceste heure si peu.
Alors, sa sœur s’estant un peu esloignée et faisant quelque chose par la chambre, Daphnide me respondit : Souvenez-vous, chevalier, que cette adventure, de laquelle Delie vous a donné l’entrée, ne se
