encores ne fut-elle pas si desdaigneuse que, pour une toison, elle ne favorisast le dieu Pan, encore qu’il eust des pieds de bouc et des cornes en la teste. – La Diane, dit-elle, dont vous parlez, respondra quand elle voudra à cette calomnie, mais je vous diray bien que, si je ne change fort d’humeur, je ne voudray jamais que celuy que je baiseray s’endorme. Et quant aux cornes de Pan, il est certain que s’il advient que j’aime quelqu’un, j’aimeray tousjours mieux qu’il les porte que moy. – Et toutesfois, luy dis-je, la lune, de qui vous avez le nom, les porte bien. – C’est parce, me respondit-elle, qu’elle n’est point mariée, et ce qu’elle en fait, ce n’est que pour advertir les amants, ausquels elle esclaire la nuict en leurs larcins, que les cornes qu’ils vont faire à autruy leur seront quelquefois rendues par d’autres. Mais, continua-t’elle, tous ces discours sont bons ; vous avez beau prolonger, si faut-il entrer en ce cabinet.
Et à ce mot, passant le bras par-dessus sa sœur, elle me poussa dedans et ferma la porte sur moy, et puis, appelant ses filles, qui estoient en une garderobbe voisine, elle s’habilla sans faire bruit, feignant que Daphnide se trouvoit mal, et puis, laissant les fenestres fermées, s’en alla donner ordre à ce que nous avions resolu. Cependant, encor qu’il y eust quelques personnes dans la chambre, nous ne laissasmes de parler ensemble, sans toutesfois ouvrir la porte. Et quoy que ce fust d’une parole assez basse, si est-ce qu’une
