pas raisonnable que cette contrainte soit establie pour vous seul, en ceste adventure que vous nommez de la parfaite amour, puisqu’il n’est permis qu’à vous seul de l’esprouver ? Mais d’autant que, pour en venir à bout, vous devez avoir à faire avec un plus rude champion que je ne suis pas, afin que vous ne puissiez vous plaindre de supercherie, je vous laisse seul avec cet ennemy qui est aupres de vous.
A ce mot, sans attendre ma response, elle se recula, et s’alla asseoir avec un livre en la main, comme elle nous avoit dit, nous laissant seuls, ma belle maistresse et moy. De quoy me sentant transporté de contentement, apres m’estre assis sur le lict aupres d’elle, je luy pris la main, et, la baisant plusieurs fois, je luy dis : Est-il bien possible, madame, que quelquefois et mon sang et ma vie me puissent acquitter envers vous de cette extréme obligation ? – Ne pensez pas, me dit-elle, qu’elle soit petite, et si vous saviez toutes les peines que j’ay eues pour vous rendre ce tesmoignage de ma bonne volonté, vous l’estimeriez sans doute plus que vous ne faites. Car, encore que ma sœur se monstre maintenant si hardie, croyez-moy, Alcidon, qu’elle n’a pas tousjours esté ainsi, et qu’il n’a pas fallu de foibles persuasions pour l’y faire consentir. Et puis, quel artifice a-t’il fallu pour tromper non seulement mon beau-frere, mais, tous ses parens et ses amis, ou pour mieux dire, toute une province entiere, puisque
