Lettre d’Alcidon à Daphnide.
Je ne sçay, madame, si vous ne recognoistrez plus cette escriture, ou si vous aurez encores memoire du nom d’Alcidon, tant des malheurs m’ont longuement esloigné de vous et empesché de vous en rafraichir la memoire par quelque bon service. Si vous vous en souvenez encore, et si la perte de deux maistres tant aimez et les loingtains voyages où les armes m’ont employé continuellement me peuvent servir d’excuse envers vous, je vous supplie, madame, et par la memoire du grand Torrismond, et par la donation qu’il vous fit de moy,vouloir pardonner à mon silence et au long temps que je n’ay eu l’honneur de vous voir, attendant que je puisse, par votre permission, vous faire sçavoir de bouche les occasions qui m’ont privé de ce bien. Et si vous voulez surpasser entierement mes esperances par vos faveurs, ordonnez-moy en quel lieu il vous plaist que je reçoive ce contentement, et vous verrez qu’Alcidon ne fut jamais plus à vous qu’il l’est encores, et que les fruicts verts qu’il vous dedia vous ont esté fidelement conservez jusques en cette saison, que vous le trouverez moins incapable de vous faire service qu’en ce temps que vous luy fistes l’honneur de le recevoir pour vostre serviteur tres-humble.
