temps, prit la couronne des Visigots, et le desir de l’augmenter. Et pour en trouver sujet, ayant sceu que le roy des Sueves vouloit estendre ses limites dans l’Espagne (quoy qu’il eust espousé sa sœur), il luy manda que, s’il ne se desistoit de cette entreprise, il s’y opposeroit. De quoy Richard ne faisant compte (c’est ainsi que s’appeloit le roy des Sueves), Thierry passa les Pyrenées, le combattit et le surmonta. Thierry estant mort fort tost apres, Euric, son frere, luy succeda, qui, par sa valeur, se sousmit presque tous ses peuples revoltez. Et apres, voyant que les Romains, qui nous appelloient leurs anciens amis et confederez, nous vouloient sousmettre comme le reste des Gaules, il tourna ses armes vers nous, je veux dire en la province des Romains.
Je ne m’arresteray point à vous déduire par le menu ses victoires, puisque cela sert fort peu a nostre discours ; je me contenteray de vous dire qu’apres avoir pris la ville des Massiliens, il vint assieger celle d’Arles, parce que, jusques en ce temps-là, je n’avois point eu de nouvelles d’Alcidon, et il n’avoit non plus eu de memoire de moy que s’il ne m’eust jamais veue. Mais alors, comme s’il se fust esveillé d’un profond sommeil, il se ressouvint de m’escrire. Vous pouvez juger, mon pere, si un jeune courage comme le mien, je veux dire glorieux à outrance pour la bonne opinion que j’avois de moy-mesme, avoit ressenty
