icy, que c’estoit le soleil de la Cour, et que la beauté de son visage, la parfaite proportion de sa taille, son adresse, sa bienseance en toutes choses, sa douce humeur, sa courtoisie, sa valeur, la vivacité et gentillesse de son esprit, sa generosité ; et bref, tant d’autres perfections qui le rendoient recommandable, luy acqueroient, au jugement de tous, l’avantage en toutes choses sur tous les plus relevez et estimez de son temps. Aussi le roy, qui était infiniment desireux que sa Cour eclairast par toute l’Europe, et que les grands et vertueux desseins de ses chevaliers la rendissent plus recommandable aux autres nations, voyant le merite d’Alcidon en cette tendre jeunesse, en voulut prendre un soin particulier, s’asseurant bien que, si cette plante estoit soigneusement cultivée, il en naistroit des fruits si doux et si estimables, qu’il en recevroit du contentement et sa Cour de la gloire.
Ne rougissez point, Alcidon, de m’ouyr parler de vous si avantageusement en votre presence. Je veux, dit-elle, se tournant vers luy, que vous sçachiez que la haine que justement je vous porte ne m’empesche pas de voir ny de dire la verité. Et parce qu’elle s’arresta, comme si elle eust voulu qu’il respondist : C’est, dit-il, ce qui m’estonne, que vous voyez en moy des choses si cachées que peut-estre tout autre qui me cognoistra bien vous contredira, et que
