Page:Urfé - L’Astrée, Troisième partie, 1631.djvu/146

on voyoit les portraits au naturel des princes qui avoient dominé ces provinces de temps en temps : de sorte que du costé de la seconde Belgique, ton voyait Pharamond, Clodion et Merovée, et aupres de luy, mais sans couronne, Childeric son fils, parce qu’il n’estoit pas encore roy des Francs, son pere estant encore en vie. En la carte des Sequanois et Heduois, l’on voyoit Athalaric et sa femme Blisinde, qui encores qu’il n’eust jamais passé le Rhin, ne laissoit d’y estre mis comme pere du vaillant Gaudiselle, premier roy des Bourguignons, qui vint sur les rives de l’Arar et du Rosne. Aupres de ce roy estoit sa femme la sage et pieuse Theudelinde. Apres eux leur fils Gundioch, qui le premier asseura veritablement sa couronne dans les Gaules ; et en fin Gondebaut avec ses trois freres, Chilperic, Godomar et Godegesile. Bref le druide avoit esté si curieux, qu’il estoit malaisé d’y desirer quelque chose qui n’y fust pas. De sorte que Daphnide, Alcidon et leur compagnie alloient admirant toutes ces raretés, comme les plus curieusement recherchées, qu’ils eussent jamais veue. Et de fortune jettant les yeux sur la carte d’Aquitaine, la belle Daphnide y vid de suitte ces vaillans Visigots qui y avoient regné. Depuis qu’elle les eut apperceus, il luy fut impossible d’en retirer la veue, parce qu’elle en recogneut et le nom et le visage de plusieurs, et entr’autres de Torrismond,