mais permettez que la loy soit esgale entre nous, c’est le moins que, comme à vostre mistresse, vous me deviez accorder. – II est vray, dit Hylas, mais comment l’entendez-vous ? – Je l’entends, continua Alexis, que comme je vous veux bien tel que vous estes, que vous me vueilliez bien aussi telle que je suis, et qu’ainsi, sans que vous changiez ny moy d’humeur ny vous de complexions, nous nous entr'aymions tousjours comme nous avons commencé. – Je veux bien, dit Hylas, une partie de ce que vous dites, mais l’autre n’est pas selon mon intention ; et je crains que vous n’ayez trop appris parmy ces clergesses des Carnutes.
Chacun se mit à rire du discours de Hylas.
Et cependant Adamas entretenoit Daphnide et Alcidon de cette sorte : Madame, luy disoit-il, je ne doute point que ce ne soit pour un bon sujet que vous soyés venue en cette contrée, car autrement vous n’eussiez pas pris une si grande peine, vous qui estes nourrie et eslevée dans les douceurs et delicatesses de la Cour, et qui luy avez si longuement servy de lustre et de loy. Et je n’aurois garde de vous en demander la cause, si ce n’estoit ce que vous m’en avez desja dit, car cognoissant par là que vous attendez quelque service de moy, le desir que j’ay de vous en faire, me rendra plus hardy à vous supplier de me le dire, à fin que je vous y serve, et selon vostre merite et selon
