Page:Urfé - L’Astrée, Troisième partie, 1631.djvu/127

ou à la voix, ou à la parole, ou en quelqu’une de ses actions, estoit de sorte interdite, qu’elle n’osoit ouvrir la bouche ; ce qu’Astrée attribuoit au peu de privauté qui estoit entr’elles, ou bien qu’ayant tousjours esté nourrie parmy les vierges druides, et ne sçachant guere des affaires de cette contrée, elle estoit en peine dequoy luy parler. Mais la bergere estoit bien deceue, puis que ce qui l’en empeschoit, c’estoit tout le contraire, et pour en sçavoir trop. Et parce que ce visage qui luy representoit celuy de Celadon, aussi bien à la memoire que devant les yeux, luy donnoit un extreme desir de gaigner les bonnes graces d’Alexis, qui ne luy estoit desja que trop acquises, elle fut la premiere à rompre le silence de cette sorte : Quand je considere la beauté de vostre visage, et les graces dont le Ciel vous a advantagée par dessus les plus belles de nostre aage, je l’appelle presque injuste d’avoir voulu priver si long-temps cette contrée de ce qu’elle a jamais produit de plus rare, en vous cachant parmy les vierges druides, si loing de nous. Mais quand je me remets devant les yeux, que de tout ce qui est en l’univers, il n’y a rien d’assez digne pour servir la grandeur de Dieu, je dis qu’il est tres-juste d’avoir fait choix de vous, comme de la chose du monde la plus parfaicte. – Pleust à Dieu, dit froidement Alexis, que les perfections que la civilité vous fait