vous tromperiez fort ; je suis bien devenu plus grand guerrier que je n’estois pas, et je vous conseille de ne vous y point hazarder, car vos armes ne sont pas d’assez bonne trempe pour fausser les miennes. – Croyez, Stiliane, adjousta Carlis, qu’Hylas n’est que pour moy, et que comme j’ay esté la premiere qu’il a aymée, je dois estre aussi la derniere. N’est-il pas vray, Hylas ? – Souvenez-vous, luy dit-il, Carlis, qu’il est certain que tout revient à son commencement, et que tout ainsi qu’au commencement que je vous vy, je ne vous aimois point, de mesme aussi la derniere fois que je vous revoy, je n’ay point d’amour pour vous.
II n’y eut personne qui se pust empescher de rire, oyant les gracieuses responses d’Hylas, qui continuerent fort long-temps, cependant qu’Alexis et Astrée parloient ensemble. Mais encores qu’il semblast qu’Alexis deust bien employer ce temps, que la fortune luy concedoit, si est-ce qu’elle demeura long-temps, sans sçavoir par où commencer, estant empeschée par tant de considerations, que peut-estre ceste commodité se fust escoulée injustement ; si Astrée n’eust commencé la premiere à parler. Car cette deguisée druide, voyant devant elle celle qui luy avoit faict le commandement de ne se laisser jamais voir à elle, craignant d’estre recogneue,
