entendre ce qu’elle vouloit qu’il fist, et sur toute chose qu’il fust secret, et ne parlast à personne de la mort de Clidaman, ny des autres accidens arrivés à Lindamor, et au roy Childeric.
Et se tournant vers le druide, lors qu’elle vit le chevalier hors de la gallerie, et que personne ne la pouvoit entendre, que la nymphe Galathée : Or, mon pere, luy dit-elle, vous avez ouy les mal-heureuses nouvelles que ce chevalier m’avoit desja racontées, et faut que j’advoue que la perte de mon fils m’a tellement touchée, que si je n’eusse permis à ma douleur de se descharger la nuict par mes larmes, je croy que l’estomac me fust ouvert, tant j’ay ressenty vivement ce coup de fortune. Mais la necessité des affaires que je me vois tomber sur les bras, m’a contrainte de dissimuler cette douleur, et il est necessaire, ma fille, que vous en fassiez de mesme, car si la mort de Clidaman vient à estre sceue avant que nous ayons donné ordre à nos affaires, je crains que Polemas n’use de quelque trahison envers nous, nous voyant mesme desnuées de tant de chevaliers, qui sont encore avec Lindamor. Et je ne dis pas ces choses sans raison, puis que j’ay remarqué il y a quelque temps, que cet homme s’attribue plus d’authorité qu’il ne devroit, qu’il a entrepris
