Page:Urfé - L’Astrée, Troisième partie, 1631.djvu/1235

l’autre moitié qu’il gardoit, il pourroit revenir en toute asseurance dans son royaume, et la figure de ceste piece estant rejoincte, avoit d’un costé une tour pour monstrer la constance : et de l’autre un dauphin au milieu des vagues tourmentées avec ce mot tout à l’entour, REND LES DESTINS CONTRAIRES. Et en mesme temps, changeant d’habits, il pria Lindamor, tout blessé qu’il estoit, de le vouloir accompagner jusques hors des mains de ce peuple avec ses chevaliers Segusiens ; et Lindamor le luy ayant accordé, Guyemants promit de donner telle sepulture au prince Clidaman, que l’on cognoistroit combien il l’avoit honoré durant sa vie. La nuit estant venue, le roy passa secrettement par la porte qui sortoit hors de la ville, et accompagné de tous nos chevaliers, fut conduit jusques aupres de Thuringe, et parce que le travail avoit beaucoup fait de mal aux playes de Lindamor, il fut contrainct de s’arrester à son retour en la ville des Rhemois, où la royne Methine prit un soin tout particulier de luy, et de sa cure. Là nous sceusmes que le genereux Andrimarte ayant rencontré la belle Silviane se resolut incontinent à la vengeance, mais adverty le mesme jour de la punition que Childeric en avoit receue, il pensa, sans