a esté surpris d’une joye extreme, quand je luy ay dit la resolution que vous aviez prise. Et parce que ce lieu est trop pres de la ville, je croy, madame, qu’il seroit bien à propos de vous en esloigner, et par les chemins je vous raconteray toutes mes nouvelles. - Mon amy, respondit Silviane, conduis-nous du costé d’Andrimarte, car je suis resolue de l’aller moy-mesme advertir de tout ce qui s’est passé.
Ce jeune homme alors se mettant devant et prenant le chemin que son maistre luy avoit asseuré qu’il tiendroit à son retour, parvint enfin à Ville Parisis, et puis laissant à main droicte les Galle-Heluetiens, essaya de gagner par les endroicts les plus couverts, Lisi et Gandelu, parce qu’Andrimarte luy avoit asseuré qu’il reviendroit par Largeri, par Fere, et par Coincy, droit à Gandelu. Et d’autant qu’il estoit desja bien tard et qu’il eut opinion que Silviane n’estant guere accoustumée d’aller de cette sorte à cheval, se trouveroit bien-tost lasse, il fit dessein de ne passer point Claye pour ce soir.
Et cependant, pour ne perdre temps, s’estant mis au milieu d’elles deux, il commença de parler de cette sorte à sa maistresse pour leur rendre le chemin moins ennuyeux : Vous desirez, madame, de sçavoir ce qui s’est passé en vostre logis depuis que vous estes
