vieux serviteur qui avoit eu le soing de sa jeunesse, et de qui l’affection estoit si grande, et la fidelité si cogneue, qu’il avoit autant d’asseurance en luy qu’en soy-mesme. Son logis estoit assez pres de celuy d’Andrimarte, car il avoit esté contraint d’en prendre un separé, lors que le chevalier n’estoit pas marié, parce qu’il avoit femme et enfans, et depuis l’avoit tousjours gardé sous l’opinion que son maistre s’en iroit bien tost en la Gaule Armorique.
Soudain qu’Andrimarte fut party, Silviane, sans en rien dire à ses filles, se retira dans la maison d’Andrenic, feignant de vouloir demeurer seule dans son cabinet, pour le desplaisir qu’elle avoit de l’esloignement de son mary, et leur commanda, si quelques dames venoient pour la visiter, de dire qu’elle se trouvoit mal, et qu’elle ne vouloit voir personne, donnant ordre qu’Andrenic seul et un valet de pied, qu’Andrimarte luy avoit laissé pour l’advertir en diligence s’il estoit necessaire avant son retour, comme celuy auquel il se fioit infiniment, luy portassent à manger, ou feignissent pour le moins de le luy porter. Elle cependant, se r’enfermant seule avec la femme d’Andrenic, demeuroit aux escoutes, tressaillant au moindre bruit qu’elle oyoit, et luy semblant de voir desja Childeric à la porte de sa chambre. C’est une
