prudence accoustumée, recevez ce que je vous dis pour y pourvoir, en sorte que ny vous ny moy n’en avons point de desplaisir. Car je say bien qu’en tous les accidens où je vois celles de nostre sexe sujettes, j’ay un recours qui ne me defaillera point, et une porte par laquelle je trouveray tousjours mes asseurances, qui est la mort ; mais j’advoue qu’il me fascheroit grandement d’esloigner si tost mon fils, et de le perdre pour si long-temps.
A ce mot se relevant sur un bras, elle luy jetta l’autre autour du col, et le baisant le couvrit tout de ses larmes, desquelles le genereux chevalier fut grandement esmeu. Et apres avoir longtemps consideré sans dire mot les discours de Silviane, et luy semblant qu’elle parloit avec beaucoup de raison, il luy respondit : Ces pleurs qui me mouillent le visage me touchent encore plus vivement le cœur, et faut que je vous advoue, que si j’eusse bien pensé à tout ce que vous me venez de representer avec tant de justes raisons, j’eusse faict en sorte que quelque autre eust eu ce voyage en ma place, mais puis que j’ay pris congé du roy, et que toutes les depesches sont entre mes mains, quelle excuse puis-je prendre qui soit valable ? et comment m’en puis-je dédire sans rompre tout à fait avec luy ? Cela veritablement ne se peut, et puis que nous en sommes venus si avant, il faut passer
