de la ville de Soissons dont il estoit gouverneur. Mais quant à moy, je croy qu’ils firent eslection de cet homme ambitieux, parce qu’il n’y eut point de Franc qui en voulust prendre ny le nom, ny la charge, de peur de ne la pouvoir maintenir contre leur roy naturel, ou pour ne point estre atteint du crime de felonnie qui est si detesté parmy eux.
Mais voyez, madame, comme, lors que Tautates veut chastier les fautes des hommes, il fait rencontrer les occasions inesperées. En ce mesme temps que desja Gillon se preparoit secrettement pour s’armer, et le reste des grands pour joindre leurs vassaux et leurs ambactes avec luy, ne voilà pas que Childeric se resolut, avec toute l’impudence que l’on sçauroit imaginer, d’oster par force Silviane à Andrimarte, non pas pour l’espouser, car aussi ne le pouvoit-il plus, estant desja mariée, mais pour en passer sa fantaisie, comme desja il avoit fait de quelques autres, depuis le decez de Merovée. Et ce qui portoit ce jeune prince à semblables desordres, c’estoit l’opinion que quelques flatteurs luy donnoient, que toutes choses estoient permises au roy ; que les roys faisoient les loix pour leurs sujects, et non pas pour eux, et que puis que la mort et la vie de ses vassaux estoit en sa puissance, qu’il en pouvoit faire de mesme pour tout ce qu’ils possedoient. Ces
