duquel il pouvoit entierement disposer. Et en ceste consideration, il commandoit à Childeric d’en faire cas, et de l’aimer non pas comme son vassal, mais comme son voisin, et duquel il pouvoit retirer beaucoup d’utilité pour le progrez et l’affermissement de ses conquestes. Mais ce ne fut rien au prix de la bonne chere que Silviane lui fit, qui desja le tenant pour son mary, vivoit presque avec l’honneste liberté de femme aupres de luy, et quoy qu’elle ne voulust rien cacher de tout ce qu’elle faisoit ou qu’elle avoit en la pensée, si est-ce qu’elle creut n’estre pas bien à propos de luy dire les discours que Childeric luy avoit tenus, tant parce qu’elle scavoit bien qu’ils estoient faux, que d’autant qu’ils luy donneroient un grand rnescontentement ; seulement elle resolut de se retirer avec luy dans les estats de Semnon le plustost qu’il luy seroit possible, et aussi-tost que leur mariage seroit faict, afin d’eviter la tyrannie du jeune Childeric, et les insolences qu’elle prevoyoit lors qu’il seroit maistre absolu des Francs.
N’y ayant donc plus rien qui empeschast l’accomplissement de ce tant souhaitté mariage, Methine par l’authorité du roy, et en suitte de la volonté de Semnon, en faict passer les articles, et huict jours apres les ceremonies
