L’amour, dit-il, que je vous porte est telle, que je contrarierois mesmes à Tautates, s’il estoit necessaire pour vostre bien ; mais puis que vous l’estimez si peu, allez, et souvenez-vous que je suis Childeric, c’est à dire le fils du roy, et qu’un jour je vous feray paroistre combien folement vous mesprisez maintenant ma bonne volonté. Et à ce mot, sans attendre sa response, il partit tout en colere, dequoy elle fut bien marrie, non pas pour elle, mais pour la crainte qu’elle avoit que son courroux ne peust rapporter du mal à son cher Andrimarte.
Cependant, Semnon ayant retenu quelques mois Andrimarte aupres de luy, et luy semblant qu’il estoit temps de le renvoyer vers Merovée, il luy donna congé de s’en retourner, à condition qu’aussi-tost que le mariage seroit accomply, il luy ameneroit Silviane, et se resoudroit de demeurer avec luy d’ordinaire pour prendre soin de ses estats, et luy donner le moyen de vivre le reste de ses jours en repos. Chacun à son tour le receut avec toute sorte d’honneur et de caresses. Merovée qui le traittoit desja comme duc de la Gaule Armorique, estoit bien-aise que par son moyen il y eust une personne de sa nation, et sur laquelle il avoit tant de puissance, qui commandast à un peuple si grand, et son voisin, luy semblant que c’estoit une grande asseurance pour sa couronne d’avoir ce costé-là si asseuré, et
