seigneur de la Gaule Armorique apres luy, et en vertu de ce futur mariage, le fit recognoistre pour tel par tous ses vassaux, et subjets, n’y ayant ny ambassades, solduriers, ny chevaliers qui ne le receussent avec applaudissement.
Quelque temps auparavant, Clidaman estoit arrivé dans l’armée de Merovée, de sorte qu’il avoit veu Andrimarte, et avoit esté fort souvent tesmoing, ou pour mieux dire son compagnon d’armes en tant de beaux exploicts qui s’estoient faicts, et mesme quand Merovée se rendit entierement seigneur de la seconde Belgique, de sorte que les nouvelles, qui se sceurent aussi tost dans la Cour de Merovée, du bon-heur de ce gentil chevalier, luy furent tres-agreables, comme aussi à tous les autres seigneurs, et princes Francs, n’y ayant que Childeric seul qui en receut du desplaisir.
Car, encores qu’il feignit le contraire, depuis que son pere l’en avoit tancé, il n’avoit eu la hardiesse de faire paroistre l’amour qu’il portoit à Silviane, qui toutesfois, au lieu de diminuer, alloit croissant de jour en jour, non toutesfois qu’il eust aucune intention de l’espouser, car il tournoit les yeux à quelque chose de plus relevé, mais il eust bien voulu la posseder en autre qualité. Et lors que chacun ouyt la bonne eslection que Semnon en avoit faicte, il ne se pouvoit empescher d’en parler desavantageusement, le blasmant quelquesfois
