bien aise que cette volonté fut venue à ce gentil chevalier, afin de commencer par là à recognoistre les grands services qu’il avoit receus de luy ; et pour ne mettre les affaires en plus de longueur, il depescha incontinent vers le duc Semnon, son cher et ancien amy, pour luy faire trouver bon ce mariage, luy promettant d’advantager de sorte Andrimarte qu’il n’auroit point de regret de lui donner sa petite fille.
Mais Childeric qui se trouva alors dans l’armée, ayant appris au commencement cette nouvelle, par les lettres de la royne sa mere, et puis par les discours de Merovée, en receut un si grand desplaisir qu’il ne se peut empescher d’en parler à son pere, couvrant son dessein sous la feinte apparence de son service : Seigneur, luy dit-il, le trouvant en particulier, j’ay sceu par les lettres de la royne et par les discours que vous en avez tenus ce matin, qu’Andrimarte pretend d’espouser Silviane. Le tres-humble service que je vous dois me commande de vous representer des choses que je pense estre bien dignes de consideration. Et encores que je ne doute point que vostre prudence accoustumée ne les ait bien desja preveues, toutesfois les grandes et plus pregnantes affaires que vous avez sur les bras, me font craindre que n’ayant pas eu loisir
