donner commencement aux premieres ardeurs de l’amour, et en fin de l’allumer en son ame, de telle sorte que depuis, ny le temps, ny les traverses qu’il receut ne peurent jamais l’esteindre.
La premiere cognoissance qu’il luy en donna, fut un soir que la royne Methine, selon sa coustume, s’alla promener le long des rivages de la Seine, car en ce temps là, elle demeuroit le plus souvent dans Paris, tant pour estre comme le centre des conquestes de Merovée, que pour un oracle qui depuis peu avoit esté rendu au temple d’Isis, qui disoit.
Le Gaulois estranger en Gaule regnera,
Lors que Paris le chef de la Gaule sera.
Parce que Merovée et ses Francs estimerent que leurs ayeuls ayans esté Gaulois, cet oracle eust voulu parler d’eux.
Or ce beau fleuve de la Seine, comme je m’asseure, madame, vous avez bien ouy dire, sert de fossé à ceste belle ville, la ceignant de ses deux bras et en faisant une isle et delectable et forte. Et d’autant qu’il ne ronge ny ne devore pas ses bords comme Loire, mais coule paisiblement parmy ceste grande plaine, qu’il arrose par cent et cent divers destours, son rivage est presque tousjours tapissé de belles et diverses fleurs, et peuplé de plusieurs sortes de beaux
