fortune, ne voulant estre cause de vous esloigner ce contentement duquel je me resjouys avec vous, comme l’une de vos meilleures amies. Damon surpris de voir ce chevalier, et ceste dame revestue de ces habits, ne sçavoit au commencement s’il estoit bien esveillé, ou s’il dormoit, mais enfin les touchant, et les oyant parler, il s’escria en les embrassant : J’advoue avec vous, Alcidon, que voicy la contrée des merveilles, mais des merveilles pleines de bon-heur, puisqu’elle m’en faict voir aujourd’huy plus que je n’eusse jamais esperé.
Et cependant que Daphnide et Alcidon saluoient Madonte, et qu’ils se resjouyssoient ensemble de ceste bonne rencontre, l’on vint advertir Adamas, que la Nymphe Amasis entroit dans la basse court. Et à peine estoit-il sorty de la chambre pour aller à la rencontre, qu’elle se trouva à la porte, où s’estant fort peu arrestée, elle entra où estoit Damon : Je pense, luy dit-elle, vaillant chevalier, que je ne vous dois jamais venir voir, sinon quand vous serez si mal-heureusement blessé par les miens mesmes. - Madame, respondit Damon, je ne pleins non plus ces blesseures que les premieres que vous me vistes, puis que si celles-là me donnerent l’honneur de voir la Nymphe et vous, madame,
