qu’il y eust quelqu’un dessus. Luy qui ne chassoit en ce lieu que pour scavoir tant plustost ce qui seroit advenu de Damon, creut incontinent que c’estoit luy que l’on portoit, ou mort, ou bien blessé, et s’en resjouyssant grandement en soy-mesme, et faisant semblant d’en estre en peine, il s’y en alla au petit pas, apres y avoir renvoyé en diligence ceux qui luy en avoient apporté les nouvelles. Et par le chemin, feignant d’ignorer que Galathée fust allée à Bon-lieu, ny qu’elle deust revenir par là, il demandoit à ceux qui estoient avec luy, qui pouvoit estre celuy que l’on portoit de ceste sorte. Personne ne sçavoit que luy respondre, parce qu’il n’avoit rien decouvert de ceste entreprise à pas un de tous ceux qui estoient autour de luy, jugeant bien qu’il faut divulguer les desseins que l’on ne veut pas executer.
Il n’eut guières marché, que l’un des siens s’en retournant vers luy dit, que c’estoit un mort que Galathée faisoit emporter à Marcilly, et qui avoit esté tué en sa presence dans le bois plus proche. Ce fut bien alors qu’il eut opinion que ses solduriers avoient exécuté ce qu’ils avoient promis, et en son cœur en avoit le contentement que la vengeance peut donner à une ame offencée, mais il ne luy dura qu’autant qu’il retarda d’arriver où estoit celuy que l’on emportoit, parce qu’alors il vid bien que ce n’estoit pas un chevalier. Et demandant à ceux qui l’avoient en charge, où ils avoient pris ce
