grand accez de fiévre. Il ne sçavoit s’il s’en devoit aller, ou s’il devoit faire sa vengeance, et tuer le ravisseur de son bien devant les yeux de celle de laquelle il pensoit d’avoir esté si mal-traicté. L’injure pretendue l’y conjuroit, l’affection et le respect l’en retiroit, mais en fin le souvenir qu’il eut de l’Oracle qu’il avoit receu à Mont-verdun, chassa de son ame tout desir de vengeance. Et soudain, se démeslant de ceux qui estoient autour de luy, et qui pensoient que tous ces tremblemens qu’ils voyoient en luy, fussent des accidens de ses blessures, il s’en courut vers la bergere en s’escriant. O Madonte ! o Madonte ! est-il possible que le Ciel m’ait en fin voulu donner ce contentement de vous voir avant que de finir mes jours ?
Et à ce mot, mettant un genouil en terre devant elle, il luy voulut prendre la main pour la luy baiser : mais Madonte, surprise plus qu’on ne sçauroit penser, premierement d’avoir rencontré ce chevalier du Tygre qu’elle alloit cherchant, puis d’avoir recogneu que c’estoit Damon, qu’elle croyoit mort il y avoit long-temps, demeura si ravie, que se le voyant à genoux devant elle, lors que moins elle l’esperoit, elle ne peut faire autre chose, au lieu de luy laisser prendre sa main, que de luy tendre les bras, et en l’embrassant, elle fut si outrée de cette prompte joye, et de cette inesperée rencontre, qu’elle se laissa aller
