ce berger que, sans respondre à son escuyer, ny sans tourner les yeux vers luy, il se laissa oster l’escu du col, et l’on commençoit de le vouloir desarmer à l’endroit où l’on voyoit le sang, car le Druide et Galathée s’estoient approchez de luy, et lors que le berger tournant les yeux de fortune sur l’escu que Halladin avoit posé en terre : O Dieu ! dit-il, madame, qu’est-ce que je voy ? Et lors, tendant à toute force le bras, il luy monstra l’escu avec le tygre se repaissant d’un cœur humain, et recognoissant que c’estoit veritablement celuy du chevalier qu’ils cherchoient : O heureux Tersandre, s’escria-t’il, et bien aimé du Ciel, puis qu’il t’a permis de conduire Madonte entre les mains de celuy à qui son aveugle affection l’a donnée, et qu’il ne veut pas que tu vives d’avantage pour ne te donner les desplaisirs d’en voir un autre plus heureux qu’il n’a voulu que tu ayes esté !
Damon oyant le nom de Tersandre, et apres, de Madonte, et l’un et l’autre ayant tourné les yeux vers luy, eust esté bien aveugle s’il ne les eust recogneus. Il vit donc ceste Madonte qu’il alloit cherchant, et ce Tersandre duquel il avoit tant desiré la rencontre pour luy oster la vie. Et en mesme temps, l’amour de Madonte, la hayne de Tersandre, l’extreme contentement de l’avoir trouvée et l’extreme colere de se voir devant les yeux de celuy duquel il pensoit estre le plus offensé, le saisirent de sorte qu’il se mit à trembler, comme s’il eust esté saisi d’un tres-
