voulu estre en sa place.
Damon s’avançoit pour luy aller aider, lors que Galathée luy cria qu’il prist garde à celuy qui l’attaquoit, et sans doute le chevalier eust esté en grand danger de sa vie, sans le cry de la Nymphe, car ayant opinion que tous les six solduriers fussent morts, il ne se prenoit pas garde que celuy qui estoit demeuré esvanouy s’estoit relevé, et s’en venoit par derriere, luy deschargeant un grand coup sur la teste, qu’estant nue, il luy eust fendue jusques aux dents. Mais tournant le visage du costé du cry, il vit tout aupres de luy cet homme qui, l’espée droite, le frappa d’un si pesant coup qu’il luy couppa l’escu en deux, en faisant cheoir une grande partie en terre ; et parce que c’estoit un tres-vaillant homme, et qui combatoit comme une personne desesperée, le combat fut fort dangereux pour Damon, qui desja blessé en deux ou trois lieux, ne pouvoit se servir de son addresse et de sa legereté comme de coustume. Toutesfois à la fin il en vint à bout, et luy donnant de I’espée dans le gosier, le luy couppa, de sorte que le sang incontinent l’estouffa.
Cependant Adamas arriva sur le mesme lieu, et Alcidon et Hermante voyant tout ce spectacle, et croyant qu’il y eust encore quelque chose à faire, se saisirent promptement chacun d’une espée et d’un escu des morts, et s’en coururent vers le chariot de la Nymphe pour la deffendre, et se
