autre, et s’il l’aymoit, pourquoy luy vouloit-elle rendre ce desplaisir, car elle ne donnoit cette permission à Paris que d’autant qu’elle se pensoit venger de Silvandre, et vouloit bien se rendre à jamais malheureuse, pourveu qu’elle sceust qu’il eust quelque regret de la voir posseder à un autre. Et en cecy Paris espreuva bien qu’il y a des heures aussi ausquelles les femmes ne peuvent guere refuser, et que celuy se peut dire heureux, qui les sçait mieux choisir, ou qui par prudence ou par fortune les rencontre.
Les remerciements qu’il fit à la bergere furent tres grands, mais inutiles, d’autant qu’elle estoit tellement hors d’elle-mesme, qu’elle n’en entendit pas une parole, au contraire, aussi-tost que l’on fut arrivé au logis, elle se desroba, et sans qu’on s’en apperceut, se retira en sa cabanne toute seule, où donnant la permission à ses yeux de pleurer, elle ne cessa de tout le reste du jour, apprenant bien à ses despens que quelque fois nous aymons plus que nous ne pensons pas, et que nous n’en prenons jamais mieux la cognoissance que par quelque mespris imaginé de la personne aymée, ou quand quelque contrainte nous prive de sa veue et de sa presence.
Adamas cependant, ayant sceu par les chemins qu’Alexis se trouvoit mal, afin de mieux desguiser son dessein, supplia Daphnide et Alcidon de luy permettre d’aller voir quel estoit son
