Madrigal
Il est jaloux de l’habit de sa maistresse.
De cet heureux habit je suis presque jaloux !
Rien jamais de parfaict ne se void entre nous :
Si, comme vous, j’avois entre mes bras ma belle,
Quel heur serait le mien !
Si vous mouriez d’amour comme je meurs pour elle,
Quel seroit vostre bien ?
Mais le Ciel qui ne veut que quelque chose humaine
Soit parfaicte en tout poinct,
Ce qui deffaut en vous, est en moy pour ma peine,
Et veut qu’ayant mon bien vous n’en jouyssiez point.
D’autre costé Adamas ayant donné le bon jour à Diane et à Phillis : Je suis bien marry, leur dit-il à toutes, qu’il faille que je vous quitte plustost que je n’avois resolu. Mais, belles bergeres, Galathée me mande que je m’en aille incontinent la trouver ; et voicy Lerindas qui a juré de ne me point abandonner que je ne sois aupres d’elle. Astrée qui ressentit le plus cette nouvelle :
