des mains de femme : Je sçay bien, luy dit-il, qui vous estes, et que vous soyez icy, ce n’est pas ce qui me met en doute, mais comment vous y pouvez estre.
Cependant qu’il parloit ainsi, toute la troupe arriva, de sorte que ces belles filles peurent ouyr que Hylas, en continuant son discours : Je scay bien, disoit-il, que vous estes Astrée. Et luy ostant les mains de dessus les yeux, il vid qu’il se trompoit et que c’estoit Laonice. – Et quoy ! Hylas, luy dit-elle, vous mescognoissez de ceste sorte vos amies ? – Ne vous en estonnez point, dit-il, bergere, car c’estoit avec beaucoup de raison que je pensois que ce fust Astrée, puis que l’ayant veue, tout à ceste heure, entrer dans ce bois, disoit-il, en monstrant l’endroit où Alexis avoit passé, lors que vous m’avez bouché les yeux, je la voyois, tout estonné, parmy ceste troupe qui venoit d’un costé tout au contraire. Et que pouvois-je penser, la voyant ainsi en divers lieux, sinon qu’aujourd’huy ce fust le jour qu’elle devoit estre par tout ? – Comment ? Hylas, dit Astrée, vous m’avez veue entrer dans ce bois ? – Je vous ay veue, dit-il, et je ne suis pas seul, car je m’asseure que Calidon est encores parmy ces coudres qui vous y cherche.
Astrée et les autres de sa troupe sçavoient bien ce qu’il vouloit dire, mais feignant le contraire : Pour certain, luy dit Diane, j’ay opinion que ce matin vous n’avez pas pris vos bons yeux, puis que ceste nymphe et nous toutes rendons bon tesmoignage
