n’ayant pas, non plus que toy porté tousjours la houlette et la pannetiere que tu me vois.
Daphnide alors prenant la parole : A la verité, dit-elle, Hylas, ce berger monstre qu’il ne me cognoist pas mal, et je crois aux paroles qu’il tient, qu’il en sçait plus que vous ne pensiez. Mais, gentil berger, dit-elle, si ce ne vous est importunité, dites-nous où vous avez appris ce que vous racontez ? – Madame, respondit Silvandre, j’ay esté longuement dans les escoles des Massiliens, où vostre nom a este tant chantdé des bardes, qu’il n’y a personne qui ne l’aye ouy. – Et comment estes-vous maintenant, dit-elle, en ceste contrée avec cet habit de berger, et qui vous y retient ? – La fortune, dit-il, m’y a conduit, et l’amour m’y arreste. – Et moy, dit Hylas, l’amour m’y a conduit, et Alexis m’y fait demeurer. – Et qui est, dit-elle en sousriant, ceste bien-heureuse Alexis ? – C’est celle-là, continua Hylas, qui vous fera rougir de honte, et paslir d’envie, la voyant si belle qu’il n’y a beauté qui puisse egaler la sienne. – Vous en dites beaucoup, Hylas, respondit-elle, pour n’estre pas creu, et trop pour estre creu du tout. – Que diriez-vous, repliqua-t’il, si je vous en disois autant qu’il y en a, puisque, n’ayant seulement que commencé d’en parler, vostre croyance est si foible ? Si vos yeux ne me servoyent bien tost de tesmoins contre vous-mesmes, je m’efforcerois de le vous tesmoigner par mes paroles ; mais je me rermets
