Page:Urfé - L’Astrée, Troisième partie, 1631.djvu/1048

Alexis, et qu’elle ne la vit point dans la chambre, elle eut opinion qu’elle se fust allé promener comme elle avoit desja faict, et toutesfois leur en demandant des nouvelles, et voyant qu’elles rioyent sans luy rien respondre, elle tourna chercher par la chambre plus curieusement. Et cependant Alexis sortant dehors sans se faire cognoistre à elle, et sans parler à personne, s’en alla entretenir ses pensées le long de la grande allée, attendant qu’elles fussent habillées. Et parce que Leonide et Diane s’en apperceurent, elles dirent à l’oreille à Astrée qu’il ne falloit luy en rien dire pour voir si elle la recognoistroit, et ainsi toutes trois l’asseurerent qu’elle se trouvoit un peu mal, et qu’elle estoit entrée dans une autre chambre, d’où elle reviendroit bien-tost. Phillis les creut aisément, mesme voyant ses habits encores sur la table. Et parce que Leonide et Diane estoient desja hors du lict, Astrée pria sa compagne de luy donner ses habits qui estoient dans ce coffre aupres de la fenestre ; elle sans y penser en rien les alla querir, et luy aydant à s’habiller, elle fut aussi-tost preste à sortir que les autres. Et lors qu’elles s’en voulurent aller : Mais, dit-elle, ne verrons-nous point Alexis ? – Il ne faut pas, dit Leonide. Quand elle est malade, elle se plaist d’estre seule, et je m’asseure qu’elle ne s’est point voulu remettre au lict cependant que nous sommes icy, parce qu’elle est presque nue ; nous reviendrons d’icy