difficulté, la croyant estre fille ; au contraire elle estoit si contente de se voir caressée d’un visage si ressemblant à celuy de Celadon, qu’elle ne demeuroit jamais endebtée des baisers qu’Alexis luy donnoit, parce qu’elle les luy rendoit incontinent, et avec double usure.
Qui pourroit se representer le contentement de cette feinte druide, ny son extreme transport ? Il faudroit quelquesfois s’estre trouvé en un semblable accident, mais on le peut juger en partie en ce qu’il s’en fallut fort peu qu’elle ne donnast cognoissance de ce qu’elle estoit, encore qu’elle sceust bien qu’à l’heure mesme qu’elle seroit recogneue, tout son bon-heur luy seroit ravy ; et n’eust esté que sur le poinct de ses plus grandes caresses, Phillis vint heurter à la porte, je ne sçay à quoy ce transport l’eust peu porter. Mais Astrée craignant que ce fust quelqu’autre, s’enfuyt promptement se rejetter dans le lict, et se cachant presque toute sous la nymphe, regardoit par dessous les linceux qui entreroit. Alexis, en desespoir d’avoir esté interrompue, s’en alla vers la porte en maudissant l’importun qui en avoit esté cause, et demandant que c’estoit, elle ouvrit à la bergere Phillis, mais tellement à contre-cœur que de tout le jour elle ne luy peut faire bon visage.
Quand Astrée sceut que c’estoit sa compagne, elle se remit un peu plus hors du lict pour luy rendre le bon jour que la bergere leur donna à toutes, et parce qu’elle alloit cherchant des yeux
