les actions de graces qu’ils devoient, et apres se retirerent au logis, en intention d’aller le lendemain au Temple de la bonne Déesse avant que faire autre chose, et puis à leur retour voir ces bergeres de Lignon, et ensemble Daphnide et Alcidon, encores que Damon eust intention de se laisser cognoistre le moins qu’il pourroit à eux, faisant dessein de demeurer encores entr’eux quelques jours, et puis, s’il ne trouvoit point de remede à ses desplaisirs, de s’en aller si loing que jamais il n’ouyst parler ny de l’Aquitaine ny de personne qu’il y eust cogneue.
S’estant donc mis à table avec cette resolution, et le disner estant presque finy, la nymphe vit entrer dans la salle un chevalier d’Amasis, et auquel elle sçavoit qu’elle avoit une grande creance. Ce chevalier, apres luy avoir rendu l’honneur qu’il luy devoit, s’approcha d’elle, et luy dit à l’oreille qu’il avoit des grandes choses à luy dire de la part d’Amasis, mais que le discours estant un peu long, et necessaire d’estre tenu secret, il ne pouvoit le luy dire qu’en particulier, en ayant mesme commandement. La nymphe qui luy vit le visage tout changé, oyant ces paroles, alla soudain penser à ce que le vacie luy avoit dict du deffaut des victimes, et ne pouvant s’imaginer un plus grand mal que la perte de sa mere, elle luy demanda tout haut comme se portoit Amasis ? – Madame, respondit-il, elle est en fort bonne santé, Dieu mercy, et desire passionnément de vous veoir, luy semblant qu’il
