icy, qui vous en diront tout ce qui s’en peut sçavoir.
Ainsi Galathée apprenoit des nouvelles de ces belles bergeres, et plus elle s’en enqueroit, et plus elle trouvoit que Celadon avoit raison d’aimer Astrée, puis que chacun luy donnoit tant d’avantage sur toutes les autres. Et le disner estant finy, la nymphe s’en alla veoir Damon, qui ne sortoit point encores de la chambre, parce que la blesseure l’avoit rendu si foible pour la perte du sang, et pour le travail qu’il avoit fait d’aller si long temps à pied avec ses armes, qu’il fut contraint de ne point se mettre à l’air, que la force ne luy fust un peu revenue, de peur de quelque inconvenient. Cependant Halladin l’estoit venu retrouver, et ne bougeoit des pieds de son lit, le servant avec tant de soing et de vigilance que Galathée mesme l’en estimoit infiniment. C’estoit le troisiesme jour qu’il avoit esté blessé, et la nymphe qui pensoit estre obligée à la valeur de ce chevalier, pour avoir esté blessé en deffendant la querelle des dames, et de plus luy estant proche, et l’outrage luy ayant esté fait en ses estats et en sa presence, elle resolut de ne l’abandonner qu’il n’eust receu sa santé entierement. Et parce que pour le desennuyer, elle luy faisoit sçavoir tout ce qu’elle apprenoit de nouveau, elle voulut que Lerindas redist en sa presence ce qu’il luy avoit rapporté de son voyage.
Le jour se passa de ceste sorte, et cependant, estant desja bien tard, Celidée et
