peu apres recommençant par un grand souspir, elle disoit : Helas ! ma sœur, j’ay veu Celadon ! Je veux dire que j’ay veu ce qui reste de Celadon.
A ce mot de Celadon, la voix se perdit en sa bouche, et la langue s’attacha à son palais ; puis serrant les mains ensemble, et tenant les yeux tendus au ciel, sembloit luy demander secours en ce travail. Phillis qui la vist en cet estat, ayant ouy le peu de paroles qu’elle venoit de dire, eut soudain opinion qu’elle avoit eu quelque songe estrange qui l’avoit espouvantée de ceste sorte, et pour l’en divertir: Ma sœur, luy dit-elle, c’est une folie de croire aux songes, car l’imagination nous represente en dormant ce que nos yeux ont veu en veillant, ou que nous avons fait ou pensé, si bien qu’ils, ne sont pas presages du futur, mais seulement images du passé. – Ah ! ma sœur, interrompit Astrée, ne croyez point que ce soit songe. Je l’ay veu de mes yeux, et soudain qu’il a conneu que je le regardois, il s’est esvanouy en l’air. – Peùt-estre, ma sœur, respondit Phillis, aviez-vous opinion de veiller, car ’cela advient bien souvent en dormant. – Ne vous figurez point cela, dit Astrée, veritablement je veillois. – Et comment est-ce, dit Phillis, que vous avez pris garde à luy ? – J’estois, respondit Astrée, ny bien esveillée, ny bien endormie, lors que je l’ay ouy souspirer
