genoux, l’adore et luy addresse d’une voix basse cette priere : Grande et puissante déesse, puis que les dieux ne font pas mieux paroistre leur divinité en punissant qu’en pardonnant, voicy je me jette à genoux. Je ne veux point entrer en jugement avec toy, ny demander si la peine que j’ay supportée n’outrepasse point la grandeur de ma fauté, puis qu’elle a esté commise par ignorance, mais seullement je te requiers que la pitié t’esmeuve en ce que mon amour t’a laissé insensible, et de rendre aussi bien cette preuve de ta divinité, en me remettant en ma felicité perdue que tu m’as osté le bon-heur où tu m’avois eslevé, puis que ma soubmission ne te doit pas moins esmouvoir au pardon que mon offence inconnue au chastiment.
Ainsi disoit le triste berger, n’osant presque laisser sortir ces mots de ses levres, de peur d’esveiller celle à qui il les adressoit. Et lors se relevant, s’approcha d’avantage d’elle, afin de la mieux considerer. Mais lors qu’il estoit plus avant en cette contemplation, par malheur Phillis se tourna d’un costé sur l’autre, sans toutesfois ouvrir les yeux, ny s’esveiller, ce qui donna tant à craindre à Celadon que, se retirant promptement à costé, il fut contraint de s’en retourner en sa triste demeure, où il ne se fut plutost renfermé que, repensant
