à la vertu, et vous permettais de l’en asseurer tout à fait, si. ce n’estoit que pour la detromper des faulses imaginations que Climanthe luy a données, il est necessaire que je ne luy sois point odieux entierement.
Avec semblables discours, mon oncle taschoit de nous donner courage, et nous faire continuer en ce louable dessein ; puis prit le chemin du costé de Laigneu, et nous celuy de Marcilly, non pas toutesfois sans consulter ensemble comme nous avions à respondre à Galathée, afin qu’il n’y eust point de contrariété entre nous, sçachant assez qu’il n’y a œil plus vif ny plus penetrant que celuy de la jalousie. Au contraire la nymphe alloit faisant dessein sur dessein pour, ce qui estoit de la possession de sa chere Lucinde, estimant mon esprit, et louant ma ruse de vous avoir fait vestir de ceste sorte, ayant esperance que cest habit luy donneroit plus de commodité de vous avoir sans soupçon continuellement aupres d’elle. Non pas, berger, qu’elle consentit jamais à chose qui contrevinst à son honnesteté, ainsi que j’ay tousjours recogneu par ses actions, mais desseignant de vous espouser, et ne l’osant declarer tant qu’Amasis vivra, elle pensoit de pouvoir jouyr longuement de vostre presence sous cet habit. Et quoy qu’elle ne peut douter de l’affection que vous portez à la belle Astrée, en se flattant elle se figuroit que la veue
