le long du chemin, il alloit cherchant un lieu où il se peust resposer, attendant que la nuict luy permist de se retirer sans estre rencontré de personne, faisant dessein d’aller si loing que jamais on n’entendist des ses nouvelles. Il jetta l’oeil sur une caverne qui du costé de l’entrée estoit lavée de la riviere, et de l’autre estoit à demy couverte d’arbres et de buissons, qui par leur espaisseur en ostoient la veue à ceux qui passoient le long du chemin. Et luy mesme n’y eust pris garde, n’eust esté qu’estant contraint de passer le long de la rive, il se trouva tout contre l’entrée, où de fortune, s’estant advancé, et luy semblant qu’il seroit bien caché jusques à la nuit, le lieu luy pleut de sorte qu’il resolut d’y passer le reste des ses jours tristes et desastrez, faisant dessein de ne point sortir de tout le jour du fond de ceste grotte. En ceste deliberation il commença de l’ageancer au mieux qu’il luy fut possible, ostant quelques cailloux que la riviere estant grande y avoit porté. Aussi n’estoit-ce autre chose qu’un rocher que l’eau estant grosse avoit cavé peu à peu et assez facilement, parce que l’ayant au commencement trouvé graveleux et tendre, il fut aisément miné, en sorte que les divers tours que l’onde contrainte avoit faits, l’avoient arrondi comme s’il eust esté fait express ; depuis venant à se baisser, elle estoit rentrée en son lict qui n’estoit qu’a trois ou quatre pas de là.
Le lieu pouvoit avoir six ou sept pas de longueur, et parce qu’elle estoit ronde, elle en avoit autant de largeur, elle estoit un peu plus haute qu’un homme, toutesfois en quelques lieux il y avoit des pointes du rocher, que le berger à coups de cailloux peu à peu alla rompant. Et parce que de fortune au plus profond il s’estoit trouvé plus dur, l’eau ne l’avoit cavé qu’en quelques endroits, qui donna moyen à Celadon avec peu de peine, rompant quelques coings plus avancez, de se faire la place d’un lict enfoncé dans le plus dur du rocher, que puis il couvrit de bousse, qui luy fut une grande commodité, parce que soudain qu’il pleuvoit à bon escient, le dessus de sa caverne, qui estoit d’un rocher fort tendre, estoit incontinent percé de l’eau, si bien qu’il n’y avoit point d’autre lieu sec que se lict delicieux.
Estant en peu d’heure accommodé de ceste sorte, il laissa sa juppe et sa panetiere, et les autres habits qui l’empeschoient
