qui ne le plaigne. Mais ç’a esté une gratieuse vengeance que celle dont amour a puni le cruel Lypandas, car repassant par le ressouvenir, la vertu, la beauté et l’affection de Melandre, il en est devenu si amoureux, que le pauvre qu’il est n’a autre consolation que de parler d’elle: mon fils me mande qu’il fait ce qu’il peut pour la sortir de prison, et qu’il espere de l’obtenir.
Voilà, contnua Amasis, comme ils vivent si pleins d’honneurs et de louanges que chacun les estime plus au’autres qui soient en l’armée. – Je prie Dieu, adjousta Adamas, qu’il les continue en ceste bonne fortune.
Cependant qu’ils descouroient ainsi, ils virent venir de loing Leonide et Lucinde, avec le petit Meril. Je dis Lucinde, parce que Celadon, comme je vous ay dit, portoit ce nom suivant la resolution que Galathée avoit faicte. Amasis qui ne la cognoissoit point, demanda qui elle estoit. C’est, respondit Galathée, une parente d’Adamas, si belle, et si remplie de vertu, que je l’ai priée de me la laisser pour quelque temps: elle se nomme Lucinde. – Il semble, dit Amasis, qu’elle soit bien autant advisée comme belle. – Je m’asseure, adjousta Galathée, que sont humeur vous plaira,et si vous le trouvez bon, elle viendra, madame, avec nous à Marcilly.
A ce mot Leonide arriva si pres, que Lucinde, pour baiser les mains à Adamas, s’advança, et mettant un genouil en terre, luy baisa la main avec des façons sie bien contrefaittes, qu’il n’y avoit celuy qui ne la prist pour fille. Amasis la relva, et apres l’avoir embrassée, la baisa en luy disant qu’elle aymoit tant Adamas, que tout ce qui luy touchoit luy estoit aussi cher que ses plus chers enfants.
Alors Adamas prit la parole de peur si la fainte Lucinde respondoit, on ne recogneust quelque chose à sa voix, mais il ne falloit pas qu’il en eust peur, car elle sçavoit si
