accident fut encor plus malheureux, en ce que presque en mesme temps les nostres recouvrerent ce qu’ils avoient perdu du champ, par le secours que Childeric donna de toute l’arriere-garde et depuis allerent tousjours gaignant le champ jusques à ce que sur le soir l’entiere route se donna et que les logis des ennemis furent bruslez, et eux la pluspart pris ou tuez.
Quant à nous, nous fusmes conduits en leur principale ville nommée Rhotomage, où mon maistre ne fut si tost arrivé que plusieurs le vindrent visiter, les uns se disans ses parents, les autres ses amis, encor qu’il n’en cogneust point. Quant à moy, je ne sçavois que dire, ny luy que penser de voir que ces estrangers luy faisoient tant de caresses, mais nous fusmes encor plus estonnez quand une dame honorable, fort bien suivie, le vint visiter, disant que c’estoit son fils, avec tant de demonstration d’amitié que Ligdamon en estoit comme hors de soy, et d’avantage encores quand elle luy dit : O Lydias, mon enfant, avec combien de contentement et de crainte vous vois-je icy ? Car je loue Dieu qu’à la fin de mes jours je vous puisse voir si estime au rapport de ceux qui vous ont pris. Mais helas ! que ne crainte est la mienne de vous voir en ceste viue si cruelle, puis que vostre ennemy Aronthe est mort des blesseures qu’il a eues de vous et que vous avez esté condamné à mort par ceux de la justice ? Quant à moy, je n’y sçay autre remede que de vous racheter promptement, et attendant que vous soyez guery,vous tenir caché afin que pouvant monter à cheval vous vous retiriez avec les Francs.
Si Ligdamon fut estonné de ce discours, vous le pouvez juger, et cogneut bien en fin qu’elle le prenoit pour un autre. Mais il ne peut luy respondre, parce qu’en mesme instant celuy qui l’avoit pris entra dans la chambre, avec
