entendre son dessein au berger, luy promettant de revenir dans deux ou trois jours au plus tard. Celadon l’en conjura par toutes les plus fortes prieres qu’il peut, cognoissant bien que sans luy ceste prison dureroit encores longuement. Apres l’en avoir asseuré il tire à part Galathée, et luy dit que le berger pour ceste heure se portoit bien, mais comme il luy avoit desja dit, il estoit à craindre qu’il ne retombast et qu’il estoit necessaire de prevenir le mal, qu’à ceste cause il vouloit aller querir ce qui luy estoit necessaire, et qu’il reviendroit aussi tost qu’il l’auroit recouvré. La nymphe fut tres aise de cecy, car d’un costé elle desiroit la guerison entiere du berger, et de l’autre la presence du druide commençoit de l’importuner, prevoyant qu’elle ne pourroit vivre si librement avec son aimé Celadon qu’auparavant. Il cogneut bien quel estoit son dessein, toutesfois il n’en fit point de semblant.
Et incontinent apres le disner il se mit en chemin, laissant les trois nymphes bien en peine, car chacune avoit un dessein different, et toutes trois voulans en venir à bout, il estoit necessaire qu’elles se trompassent bien finement. Cela estoit cause que le plus souvent elles estoient toutes trois autour de son lict, mais Silvie plus que toutes les autres, afin d’empescher qu’elles ne luy peussent parler en particulier.
Si ne peut-elle faire si bon guet, que Leonide ne prist le temps luy dire la resolution qu’elle avoit prise avec son oncle, et puis elle continua : Mais dites la verité, Celadon, vous estes encor si mescognoissant que, quand vous aurez receu ce bon office de moy, vous ne vous en ressouviendrez non plus que vous voyez à ceste heure l’amitié que je vous porte. Pour le moins ayez memoire des outrages que Galathée me fait à vostre occasion, et si l’amour qui en toute autre merite un autre amour, ne peut, naissant
