lors le sable, l’effroy de la mort et les taches qu’il avoit au visage gardoient que sa beauté ne se pouvoit remarquer. Et quant à moy, je maudissois l’enchanteur, et le devin qui estoit cause que nous avions ceste peine, car je vous jure que je n’en eus de ma vie tant. Mais depuis qu’il fut revenu, et que son visage ne fut plus souillé, il parut le plus bel homme qui se puisse dire, outre qu’il a l’esprit ressentant tout autre chose plustost que le berger. Je n’ay rien veu en nostre cour de plus civilizé ny de plus digne d’estre aimé, si bien que je ne m’estonne pas si Galathée en est tant esperdument amoureuse qu’à peine le peut-elle abandonner la nuict. Mais certes elle se trompe bien, d’autant que ce berger est perdu d’amour pour une bergere nommée Astrée. Si est-ce que toutes ces choses n’ont pas fait un coup contre Lindamor, parce que la nymphe ayant trouvé vray ce que le menteur luy a dit, est resolue de mourir plustost que d’espouser Lindamor, et s’estudie par toute sorte d’artifice de se faire aimer à ce berger, qui ne fait, mesme en sa presence, que souspirer l’esloignement d’Astrée. Je ne sçay si la contrainte où il se trouve (car elle ne le veut point laisser sortir du palais) ou si l’eau qu’il beut quand il tomba dans la riviere en est la cause. Tant y a que depuis il est allé trainant, tantost dans le lict, tantost dehors, mais en fin il a pris une fievre si ardente, que ne sçachant plus de remede à sa santé, la nymphe me commanda de venir en diligence vous querir à fin que vissiez ce qui seroit necessaire pour le sauver.
Le druyde estoit demeuré fort attentif durant ce discours, et fit divers jugements selon les sujets des paroles de sa niece, et peut-estre assez approchans du vray, car il cogneut bien qu’elle n’estoit pas du tout exempte ny d’amour, ny
