Cette page n’a pas encore été corrigée
est la chose atornee
- A l’andemain, a l’ajornee.
- L’andemain, lués que il ajorne,
- Li rois se lieve, si s’atorne,
- Et por aler an la forest
- D’une corte cote se vest.
- Les chevaliers fet esvellier,
- Les chaceors, aparellier.
- Ja sont tuit monté, si s’an vont,
- Lor ars et lor saietes ont.
- Aprés aus monte la reïne,
- Ansanble o li une meschine.
- Pucele estoit, fille de roi,
- Et sist sor un blanc palefroi.
- Aprés les siut a esperon
- Uns chevaliers, Erec ot non.
- De la Table Reonde estoit,
- Mout grant los an la cort avoit.
- De tant come il i ot esté,
- N’i ot chevalier plus loé ;
- Et fu tant biaus, qu’an nule terre
- N’esteüst plus bel de lui querre.
- Mout estoit biaus et preuz et janz,
- Et n’avoit pas vint et cinc anz.
- Onques nus hon de son aage
- Ne fu de greignor vasselage.
- Que diroie de ses bontez ?
- Sor un cheval estoit montez,
- Afublez d’un mantel ermin
- Galopant vint tot le chemin,
- S’ot cote d’un diaspre noble,
- Qui fu fez an Costantinoble.
- Chauces de paile avoit chauciees,
- Mout bien feites et bien tailliees,
- Et fu es estriers afichiez,
