Cette page n’a pas encore été corrigée
Si lor comande qu’il s’assieent.
- Cil son comandemant ne vieent,
- Assis se sont tot maintenant.
- Or a Enide joie grant
- Quant son pere et sa mere voit,
- Que mout lonc tans passé avoit
- Que ele nes avoit veüz.
- Mout l’an est granz joies creüz :
- Mout l’an fu bel et mout li plot ;
- Sanblant an fist, quanqu’ele pot ;
- Mes n’an pot pas tel sanblant feire
- Qu’ancor ne fust la joie meire.
- Ne ie n’an vuel ore plus dire,
- Que vers la cort li cuers me tire,
- Qui ja estoit tote assanblee.
- De mainte diverse contree
- I ot contes et dus et rois,
- Normanz, Bretons, Escoz, Irois ;
- D’Angleterre et de Cornoaille
- I ot mout riche baronaille,
- Que des Gales jusqu’an Anjo,
- Ne el Mainne ne an Peito
- N’ot chevalier de grant afeire
- Ne jantil dame de bone eire
- Que les mellors et les plus jantes
- Ne fussent a la cort a Nantes,
- Si con li rois les ot mandez.
- Or o
- La grant joie et la grant hautesce,
- La seignorie et la richesce,
- Qui a la cort fu demenee.
- Einçois que none fust sonee,
- Ot adobé li rois Artus
- Quatre çanz chevaliers et plus,
- Toz fiz de contes et de rois.
- Chevaus dona a chascun trois,
