Cette page n’a pas encore été corrigée
Guivrez desçant, qui mout fu liez,
- Et vet Erec cheoir as piez
- La ou il gisoit a la terre.
- « Sire, je vos aloie querre, »
- Fet il, "vers Limors droite voie,
- Que mort trover vos i cuidoie.
- Por voir m’estoit dit et conté,
- Qu’a Limors an avoit porté
- Un chevalier navré a mort
- Li cuens Oringles, et a tort
- Une dame esposer voloit
- Qu’ansanble o lui trovee avoit ;
- Mes ele n’avoit de lui soing.
- Et je venoie a grant besoing
- Por li eidier et delivrer.
- Se il ne me vossist livrer
- La dame et vos sanz contredit,
- Je me prisasse mout petit,
- S’un pié de terre li leissasse.
- Sachiez, se mout ne vos amasse,
- Que ja ne m’an fusse antremis.
- Je sui Guivrez, li vostre amis ;
- Mes se je vos ai fet enui
- Por ce que je ne vos conui,
- Pardoner bien le me devez."
- A cest mot s’est Erec levez
- An son seant, qu’il ne pot plus ;
- Et dist : "Amis, relevez sus !
- De cest forfet quites soiiez,
- Quant vos ne me conoissiiez."
- Guivrez se lieve, et il li conte
- Comant il a ocis le conte
- La ou il manjoit a sa table,
- Et comant devant une estable
- Avoit recovré son destrier,
- Comant serjant et escuiier
- Fuiant crioient an la place :
- « Fuiiez,