ces mortelz inconvéniens, qui jà sont si avanciez que très maintenant en y a de destruitz et désers de leurs biens, et détruit-on tous les jours de piz en piz, tant que qui est crestien en doit avoir pitié. Et oultre ce, seroit encore à notter à cellui prince ou princesse qui le cuer aroit tant obstiné en pécbié, qu’il n’accompteroit nulle chose a Dieu ne à si fortes douleurs, s’il n’estoit du tout fol ou folle, les très variables tours de fortune, qui, en un tout seul moment, se puet changer et muer.
Dieux ! à quans coups eust pensé la royne Olimpias, mère du grant Alexandre, ou temps qu’elle veoit tout le monde soulz ses piez, à elle subgiet et obéissant, que fortune eust puissance de la conduire ou point ou quel piteusement fina ses jours à grant honte ! Et semblablement d’assés d’autres pourroit-on dire. Mais qu’en advient-il, quant fortune a ainsi acqueilly aucun puissant ? Se si saigement n’a tant fait, le temps passé, par le moyen d’amours, de pitié et charité qu’il ait acquiz Dieu premièrement et bien vueillans au monde, toute sa vie et ses faiz sont racontez en publique et tournez en repprouche. Et tout ainsi comme à un chien qui est chacié tous lui queurent sus, et est celli de tous deffoulez, en criant sus lui qu’il est bien employez.
Très excellant et ma très redoubtée Dame, infinies raisons vous pourroient estre reccordées des causes qui vous doivent mouvoir à pitié et à traictié de paix : les quelles vostre bon scens n’ignore mie. Si fineray à tant mon espitre, suppliant vostre digne majesté qu’elle l’ait agréable et soit favourable à la plourable requeste par moy escripte de vos
