Au sur-plus ie n’ay veu en ceste isle chose digne d’escrire, sinon qu’il y a grande quantité de scorpions, et plus dangereux que ceux que i’ay veuz en Turquie, comme i’ai congneu par experience : aussi les Turcs les amassent diligemmêt pour en faire huille propre à la medecine, ainsi comme les medecins en sçauent fort bien user.
CHAPITRE VIII.
Isles de Madere non congneûes des anciens. Nous ne lisons poït es Auteurs, que ces isles ayant aucunement esté congneues ne decouuertes, que depuis soixante ans en-ça que les Espagnols et Portugais se sont hazardez et etrepris plusieurs nauigations en l’Ocean. Et comme auons dit cy deuant[1], Ptolemée a bien eu côgnoissance de noz isles Fortunées, mesmes iusques au cap Verd. Pline aussi fait mention que Iuba emmena deux chiens de la grande Canarie, outre plusieurs autres qui en ont parlé. Les Portugais doncques ont esté
- ↑ Voir plus haut, chapitre v.
