Cette page n’a pas encore été corrigée
Lur nature ne poet prendre
1784 Si grant glorie, ne entendre.
Cil lur ad dist :’Return nus !
Avant d’ici ne menrai vus ;
Ne vus leist pas aler avant,
1788 Quar poi estes a ço savant.
Brandans, tu veis cest paraïs
Que tu a Deu mult requeïs.
De la glorie cent mil tant
1792 Que n’as veüd, ad ça avant.
A ore plus n’i aprendras,
Devant iço que revendras.
O or venis ci carnalment
1796 Tost revendras spiritalment.
Or t’en reva ; ci revendras,
Le juïse ci atendras.
De cez peres en fai porter
1800 A enseignes de conforter.’Puis que out ço dist, il en alat,
Enseignes de paraïs portat.
